IDEGA Information

O Instituto de Estudos e Desenvolvemento de Galicia (IDEGA) é un centro da Universidade de Santiago de Compostela (USC), creado en 1976, co propósito de fomentar a investigación científica de excelencia no ámbito das ciencias sociais, contribuíndo á xeración de coñecemento sobre a realidade social, económica e territorial de Galicia e á difusión dos resultados da investigación en beneficio de toda a sociedade. En 2022, despois de case cincuenta anos abordando os desafíos aos que a sociedade se foi enfrontando, o IDEGA acometeu unha reformulación da súa axenda científica co gallo de adaptala aos retos da sociedade actual: unha sociedade que esixe de abordaxes multi e trans-disciplinares amplos e inclusivos para responder aos seus desafíos. En suma, no contexto da investigación en Ciencias Sociais e Xurídicas en Galicia, o IDEGA preséntase como un centro multidisciplinar de investigación e formación de referencia, que integra saberes e capacidades de diferentes ámbitos de coñecemento, o que permite incorporar as distintas dimensións social, política, de gobernanza, económica, xurídica, tecnolóxica, empresarial, xeográfica ou cultural, para promover proxectos que abordan os principais retos socioeconómicos que como sociedade enfrontamos.